జస్ట్ రాయాలనిపించింది అంతే - చివరి భాగం -.... యాభై అయ్యాయి కదా!!! ఇంక చాల్లెండి. మిమ్మల్ని మరీ ఎక్కువ హింసిస్తున్నానేమో అనిపిస్తోంది.

వీటిని హైకూలు అనచ్చో లేదో నాకు తెలియదు. జస్ట్ రాయాలనిపించింది అంతే. నచ్చితే భుజం తట్టండి

౩౭ 

తెలంగాణా ఉద్యమం

జనాల కన్నా

జేఏసి లే ఎక్కువున్నాయి

౩౮ 

ఛానెల్లో చర్చలు

ఎప్పుడు చూసినా

అవే మొహాలు 

౩౯ 

అతివృష్టి

ఎటుచూసినా నీళ్ళే

పొలంలో, రైతు కళ్ళలో

౪౦ 

గతేడాది పిల్లలకి

వేసవి శలవలతో పాటు

వేర్పాటు శలవలూ వచ్చాయి 

౪౧ 

కమిటీ రిపోర్టిచ్చింది

ఏడాది క్రితం పరిస్థితికి

తీసుకొచ్చి వదిలేసింది 

౪౨ 

శ్రీ కృష్ణ కమిటీ

కొండని తవ్వి

ఎలకనీ వదిలేసింది 

౪౩ 

అందరికీ ఆమోదయోగ్యం

అంటే

ఎవరికీ అక్ఖర్లేదని అర్ధం

౪౪ 

ఎవరన్నారు 

దేశం క్రీడల్లో వెనకుందని?

నేతలు జనాలతో ఆడుకోవట్లేదూ

౪౫ 

మార్కెట్ కెళ్లా

జేబు ఖాళీ అయి

సగం సంచి నిండింది 

౪౬ 

డైలీ సీరియల్ హీరొయిన్ 

వీలునామాలో 

తన పాత్ర మునిమనవరాలికి రాసింది 

౪౭ 

మా ముత్తాతకి , శ్రీ శ్రీ కి  

ఒక పోలికుంది

ఇద్దరూ కీర్తి శేషులే 

౪౮ 

ఎవరో అడిగారు నా వయసెంతని

12045 డైలీ సీరియల్ ఎపిసోడ్లు 

నా సమాధానం

౪౯ 

మా ఊరికి రైల్లో ప్రయాణం

రైలు ముందుకి

ఆలోచనలు వెనక్కి

౫౦ 

దేవతలకే కాదు మనకీ తెల్సు 

అమృతం రుచి

కాపోతే మనం అమ్మచేతి వంట అంటాం 

మొదటి భాగం

రెండవ భాగం

మూడవ భాగం

ఇంక చాలు మహాప్రభో అనుకుంటున్నారా? ఏదో మీ అభిమానం. ఈ సారికిలా కానిచ్చేయండి.

అయ్యబాబోయ్..ఈ రోజేంటి ఇలా బ్లాగేస్తున్నాను!!!! - జస్ట్ రాయాలనిపించింది అంతే - మూడవ భాగం .

వీటిని హైకూలు అనచ్చో లేదో నాకు తెలియదు. జస్ట్ రాయాలనిపించింది అంతే . నచ్చితే భుజం తట్టండి

౨౨. 

రెండో క్లాసు కుర్రాడు 

పొద్దున్న స్కూలుకి 

సాయంత్రం ఐ ఐ టి కోచింగ్ కి

౨౩. 

ఒంటి నిండా బట్టలేని జనం

మురికివాడల్లోనూ

మెట్రో పబ్బుల్లోనూ 

౨౪. 

ఈ గతుకుల మీదొట్టు

ఈ రోడ్డు

మొన్నే వేశారు

౨౫. 

అన్ని చానెళ్ళలో 

అదే న్యూస్ 

ఎవడికి వాడే "ఎక్స్లూజివ్"

౨౬. 

దున్నపోతు ఈనిందట 

ఇది సీమాంధ్రుల కుట్రే 

ఓ వేర్పాటు వాది స్టేట్మెంట్  

౨౭. 

రోడ్ల భద్రతపై అధ్యయనానికి 

మన అధికారులు 

వెనిస్ వెళ్లి వచ్చారు 

౨౮. 

జీతం వచ్చింది

కాగితం మీద బడ్జెట్ తర్వాత

లోటు వెక్కిరించింది 

౨౯.

తాగుబోతు డ్రైవింగ్ 

వెధవరోడ్లు

తిన్నగా ఉండి చావవు

౩౦. 

ఈ ప్రపంచం లో 

అనంతమయినవి ఏమి లేవు

డైలీ సీరియల్స్ తప్ప

౩౧. 

బాలకృష్ణ సినిమా హిట్టట 

పుష్కర కాలం 

అసలు గడిచినట్టే తెలియలేదు 

౩౨. 

పైరసీని అరికట్టండి

హాలీవుడ్ కధ కాపీ కొట్టిన 

దర్శకుడి విజ్ఞప్తి 

౩౩. 

మా ఊళ్ళో బస్సు దిగా

అమ్మ ఒడిలో 

తలపెట్టినట్టు ఉంది 

(ఇప్పుడే "తోటయ్య" పోస్ట్ తో మా ఊరిని గుర్తుకు తెచ్చిన తృష్ణ గారికి ధన్యవాదాలతో)

౩౪. 

అల్మారా సర్దుతుంటే 

పాత ఆల్బం దొరికింది

దాంతో పాటే జ్ఞాపకాలూనూ

౩౫ 

ఎమ్మెస్ సుబ్బలక్ష్మి పాడుతోంది

చిన్నప్పుడు

ఉగ్గు బదులు తేనె తాగేసిందేమో 

౩౬. 

రెండు శరీరాల్లో 

ఒకే ఆత్మ

బాపు - రమణ 

మొదటి భాగం

రెండవ భాగం 

జస్ట్ రాయాలనిపించింది అంతే - రెండవ భాగం

వీటిని హైకూలు అనచ్చో లేదో నాకు తెలియదు. జస్ట్ రాయాలనిపించింది అంతే. వీటిలో కొన్ని పాతవి, కొన్ని కొత్తవి. నచ్చితే భుజం తట్టండి

౧౧. 

ఇప్పుడే భోజనమయింది 

ఇక ప్రకటించేయ్యచ్చు

ఒక్క పూట ఆమరణ దీక్ష

౧౨. 

మూడు తరాలుగా సాగుతోంది

ఆ టివి సీరియల్ 

ఇంకా సగం కూడా కాలేదట 

౧౩ 

ర్యాంక్ తగ్గింది

రైలు పట్టాల మీద 

ఇంటర్ కుర్రాడి శవం 

౧౪. 

అంతా ప్రశాంతం గా ఉంది 

ఆనందం గా లేనిది 

ఆ న్యూస్ చానెల్ వాళ్ళే 

౧౫. 

మన దేశం లో దొంగలకి 

మర్యాదేక్కువ

పార్లమెంట్లో కూర్చోపెడతాం 

౧౬. 

సొనియమ్మ కి మూడ్ బాలేదట 

ఎపి సిఎం 

మళ్ళీ మారతాడేమో

౧౭. 

నాస్తిక నేత మరణం 

కాల్చాలా? పూడ్చాలా? 

న్యూస్ చానెల్ లో SMS POLL 

౧౮.

పెళ్లి చూపులయ్యాయి 

అధిష్టానంతో సంప్రదించి చెప్తాం 

అబ్బాయి తరపు వారి సమాధానం

౧౯ 

అన్నిటికీ రాజీవ్, ఇందిరే

తన కొడుక్కి మాత్రం 

ఆ పేరు పెట్టలేదేందుకో ఆ నేత 

౨౦ 

మా వాడి ప్రోగ్రెస్ రిపోర్ట్ ఇవ్వాలట 

ఇంటికి ఇద్దరు చొప్పున రమ్మని

స్కూల్ నించి ఆహ్వానం 

౨౧. 

ఘంటసాలా? ఏ ప్రోగ్రాం లో సింగర్? 

స్రిప్ట్ చదువుతున్న 

మ్యూజిక్ షో యాంకరమ్మ ప్రశ్న 

జస్ట్ రాయాలనిపించింది అంతే

వీటిని హైకూలు అనచ్చో లేదో నాకు తెలియదు . జస్ట్ రాయాలనిపించింది అంతే. వీటిలో కొన్ని పాతవి, కొన్ని కొత్తవి. నచ్చితే భుజం తట్టండి

౧.

పెద్ద బాలశిక్ష 

పేరెక్కడో విన్నా

వీక్లీయా? మంత్లీయా?

౨. 

కూతురు పుట్టిందట

grl brn అని 

బామ్మర్ది sms 

౩. 

మా వీధిలో గేదె ఈనింది

ఇందాకనే చూసా

ఏదో టీవి బ్రేకింగ్ న్యూస్ లో

౪. 

ఉల్లిపాయ 

కోసినా, కొన్నా

కన్నీళ్ళే 

౫ 

ఆదివారం తర్వాత ఏ వారం?

ఈ వారం రియాల్టీ షో లో 

ప్రేక్షకులకు sms ప్రశ్న

౬. 

బందులు, ధర్నాలతో 

ఏడాదంతా గడిచిపోయింది

రేపట్నించి కాలేజి లో ఎగ్జామ్స్ 

౭. 

రాష్ట్రం ప్రశాంతంగా ఉంది

ముఖ్యమంత్రి స్టేట్మెంట్ 

సచివాలయం ఎదురుగా లాఠిచార్జ్ 

౮.

అహింసాయుత మార్గం లో స్వాతంత్రం

గొప్పగా చెప్పుకుందాం

రక్తపాతాల ఆర్తనాదాల మధ్య 

౯. 

నేటి పిల్లలకి 

టెల్గు బాగా వచ్చు

అ ఆ ఇ ఈ F 

౧౦

ఆంధ్ర ప్రదేశ్ రాజధాని 

పుస్తకాల్లో హైదరాబాదే 

పాలన మాత్రం ఢిల్లీ లో 

"పావలా" కు నివాళి

"త్వరలో పావలా ని రద్దు చేసేస్తున్నరట్రా ఇక నుంచి అర్ధ రూపాయే కనీస విలువగా చలామణీ లో ఉంటుందిట" పేపర్లో చదివిన వార్త మా ఫ్రెండ్ తో పంచుకున్నప్పుడు "వెధవ పావలా దాన్ని ఉంచితే ఎంత? రద్దు చేస్తే ఎంత?, అయినా ఈ రోజుల్లో ఏమొస్తుంది పావలాకి? ముష్టి వాడు కూడా తీసుకోడు" అన్న వాడి మాటలకి కాస్త చివుక్కుమంది. నిజమే పావలాకి ఇప్పుడు ఏమొస్తుంది? ప్రభుత్వ పధకాలలో, ఎన్నికల వాగ్దానాలలో "పావలా వడ్డీ" అని చెప్పుకోడానికి తప్ప ఇప్పుడు దానికి విలువేముంది?  కానీ ఒకప్పుడు ఆ పావలాతోనే ఎన్నో సంతోషాలని కొనుక్కున్నా. 

చిన్నప్పుడు స్కూల్ దగ్గర ఐస్ సోడా, వేరుశనగ ఉండలు, ఉప్పూ కారం అద్దిన మావిడికాయ ముక్కలు, కారపు నీళ్ళలో ఊరబెట్టిన పెద్ద ఉసిరికాయలు, పీచు మిఠాయి, సొంపాపిడి, చిన్న చిన్న మావిడి తాండ్ర ముక్కలు, బుల్లి కోన్ తో ఐస్ క్రీం, కాస్త పెద్ద సైజు రబ్బరు (ఇప్పుడు స్టైల్ గా ఎరేజర్ అంటున్నాం లెండి), బాల్ పాయింట్ పెన్ రీఫిలు, చిన్న సైకిల్ గంట అద్దె ..ఇలా ఒకటా.. రెండా చేతిలో పావలా ఉంటే నా పరిధిలో అన్ని విలాసాలు తీర్చేసుకోవచ్చు అని నమ్మేవాడిని. అవును మరి.. . అప్పట్లో ఎలిమెంటరీ స్కూలు కుర్రాడి రోజువారీ  పాకెట్ మనీ పావలా ఉంటే వాడు మహా రిచ్ గా లెక్క. 

స్కూలు ముందు ఒక ముసలాయన కర్రకి ఆ చివర రంగు రంగుల జీడిపాకం లాంటిది కట్టుకుని దాంతో వాచీ,కోతిబొమ్మ చేసేవాడు, దాని విలువ పావలాయే. ఇక మా ఊరి చొల్లంగి తీర్ధం లో పావలాకి ఇచ్చే జీళ్ళు (సాధారణం గా పావలాకి రెండు ఇచ్చేవాళ్ళు), అలాగే ఆ తీర్ధం లో  దాదాపు మా ఈడు కొడుకును పక్కనే నిలబెట్టుకుని  చేత్తో తిప్పే రంగుల రాట్నం నడిపే  ఒకతను దాన్ని ఎక్కడానికి మా దగ్గరనుంచి వసూలు చేసేది పావలాయే. రంగుల రాట్నం లో తిరుగుతున్న మమ్మల్ని ఆశగా చూసే ఆ కుర్రాడి చూపుల్లో "నీకూ నాకు తేడా ఒక్క పావలాయే" అన్న అర్ధం ఉండేదేమో అని ఇప్పుడనిపిస్తుంది. 

ఇక సంక్రాంతికి ఇంటిముందుకి వచ్చే హరిదాసుకి దోసిలి నిండా బియ్యం తో పాటు ఒక పావలాయో, అర్ధరూపాయో ఇవ్వడం, గంగిరెద్దులవాళ్ళు ఇంటి ముందు చేయించిన విన్యాసాలకి బహుమతిగా మా తాతగారు రూపాయో, రెండ్రూపాయలో ఇచ్చినప్పుడు, నేను సైతం అంటూ నా నిక్కరు జేబులో అపురూపంగా దాచుకున్న పావలాని వాళ్లకిచ్చేయడం (ఆ తరువాత నా దగ్గర దాచుకున్న పావలా వాళ్లకిచ్చేసానని మా తాతగారు నా చేతిలో ఏ అర్ధ రూపాయో పెట్టడం వేరే సంగతనుకోండి :) ) 

ఒక్కటా రెండా...పావలాతో ఇన్ని జ్ఞాపకాలు. అలాంటి ఆ పావలా ఇక ముందు కనిపించదంటే కలుక్కుమనదా మరి. 

జనవరి ఐదవ తేదీ రాత్రి సమైక్య, వేర్పాటు వాదుల ఆలోచన ఎలా ఉంటుందన్న చిన్న చిలిపి ఆలోచనతో - ఒక పేరడీ

మంచి మిత్రులు సినిమాలో "ఎన్నాళ్ళో వేచిన ఉదయం" నాకు చాలా ఇష్టమయిన పాటల్లో ఒకటి. రేపు జనవరి ఆరో తేదీన శ్రీ కృష్ణ కమిటీ రిపోర్ట్ మన ముందుకు రానున్న తరుణంలో ఐదవ తేదీ రాత్రి సమైక్య,వేర్పాటు వాదుల  ఆలోచనలు ఏ విధంగా ఉంటాయన్న చిలిపి ఆలోచనతో ఏ పాట రాయడం జరిగింది. ఆ సినిమాలో ఇద్దరు మిత్రులు ఒకరినొకరు కలుసుకొనేటప్పుడు తమ ఆలోచనల్లో వచ్చిన మార్పు గురించి అవతలివాళ్ళకి చెప్పాలనే ఆత్రుతతో తెల్లరడం గురించి ఎదురుచూస్తూ ఉంటారని మీకు తెలిసే ఉంటుంది. అలాగే ఆరవ తేదీ గురించి సమైక్య, విభజన వాదులు తమ ఆలోచనలు మార్చుకుంటే ఎలా ఉంటుందనేదే ఈ పేరడీ కి స్ఫూర్తి. ఇంత సూపర్ హిట్ పాట  ట్యూన్ మీకు తెలియదని కాదు. అయినా ఏదో నా తృప్తి కొద్దీ పాట లింక్ కింద ఇస్తున్నాను. ట్యూన్ కి తగ్గట్టు పేరడీ ఉందా లేదా అనేది మీరే చెప్పాలి. 


http://www.box.net/shared/e3f7u0du1p



ఎన్నాళ్ళో వేచిన ఉదయం
ఈనాడే ఎదురవుతుంటే
ఎన్నాళ్ళో వేచిన ఉదయం

ఈనాడే ఎదురవుతుంటే 

ఇన్నినాళ్ళు దాచిన సత్యం

ఉబికి ఉబికి వస్తుంటే 

ఇంకా తెలవారదేమి 

ఈ సస్పెన్స్ విడిపోదేమి?

ఇంకా తెలవారదేమి 

ఈ సస్పెన్స్ విడిపోదేమి?

ఒకటిగా నిలిచిన జాతిని 

ఏ తంత్రం ఏమీ చేయదని 

ఐక్యత కోరే వారికి

ఏనాటికి ముప్పే రాదనీ

ఐక్యత కోరే వారికి

ఏనాటికి ముప్పే రాదనీ

నేనెరిగిన సమైక్య వాదం

నీతో చెప్పాలని వస్తే 

ఇంకా తెలవారదేమి 

ఈ సస్పెన్స్ విడిపోదేమి?

నేతలు తిరిగే జాతిలో 

ఏ ఐక్యత పనికి రాదనీ

ప్రగతిని కోరే స్టేటులో 

తమ ప్రాంత స్వార్ధమే మేలని 

నేచూసిన విభజనిజం

నీతో చెప్పాలని వస్తే 

ఇంకా తెలవారదేమి 

ఈ సస్పెన్స్ విడిపోదేమి?

ఇంకా తెలవారదేమి 

ఈ సస్పెన్స్ విడిపోదేమి?

"విభజనిజం" అనే కొత్త పదం పుట్టించాల్సి వచ్చింది. దీనికి వీరతాడు వేసినా (ఎవరూ పుట్టించకుండా కొత్త పదాలు ఎలా పుడతాయి - మాయా బజార్ లో ఘటోత్కచుడు), భాషను ఖూనీ చేసానని తిట్టుకున్నామీ  ఇష్టం. ఈ ప్రయత్నం నచ్చితే ఒక చిన్న కామెంట్ తో భుజం తట్టండి చాలు!!!! 

అసలు శ్రీ కృష్ణ కమిటీ తన రిపోర్ట్ లో ఏం చెప్పింది?

నాకు మాత్రం ఏం తెలుసండీ? జనవరి ఆరో తారీఖు దాకా ఆగాల్సిందే అట. 

.

.

.

.

.

.

.

.

-

-

-

-

-

-

-

ఏమనుకోకండి, అసలు సంగతేంటంటే బాపు రమణ లను కలిసిన విశేషాలు మీ అందరితో పంచుకుందామని ఉత్సాహంగా  పోస్ట్ పెడితే ఎంత మంది చదివారో నాకు తెలియదు కానీ కామెంట్ల ద్వారా స్పందన మాత్రం చాలా తక్కువగా వచ్చింది. అసలు సమస్య పోస్ట్ హెడ్ లైన్ లో ఉందా లేక మరొకటా అనేది తెలుసుకోవడానికి ఇలా ఈ హెడ్ లైన్ తో పోస్ట్ పెట్టాల్సోచ్చింది. అన్యధా భావించకండి. 

కళాకారుడికి చప్పట్లు, బ్లాగ్గేయకారుడికి కామెంట్లే కదండీ ఉత్సాహాన్ని, ప్రోత్సాహాన్ని ఇచ్చేవి. కుసింత ఆలోచించండి. 

బాపు - రమణ పక్కన్నేనూ మా ఆవిడ.....రెండవ భాగం.

బాపు గారితో ఆయన స్టూడియో లోకి అడుగుపెడుతూనే ఎదురుగా లారెల్ అండ్ హార్డీ ఇలా పలకరించారు.

 పెద్ద హాలు...ఎటు చూసినా నేల మీద  చిందర వందరగా పరచిన కాగితాలు, పుస్తకాలు, షెల్ఫ్ ల నిండా పుస్తకాలు, గదికి ఆ మూల ఒక కిటికీ, దాని పక్కన బాపు గారు నేలమీదే కూర్చుని బొమ్మలేసుకునే చిన్న టేబుల్. నాకు ఆ గదిలో అడుగుపెడుతూనే నాకు బాగా నచ్చినది ఆ కిటికీ. వర్షాకాలం ఆ కిటికీ లోంచి వర్షాన్ని చూస్తూ, వేడి వేడి పకోడీలు, టీ కాంబినేషన్ తో బాపు, రమణ గార్లతో  బాతాఖాని వేస్తే భలే ఉంటుందనిపించింది. 

ఇక అక్కడున్న ఫోటోలు అన్నిటిలో నాకు బాగానచ్చినది బడే గులాం అలీ ఖాన్, ఎమ్మెస్ సుబ్బలక్ష్మి గార్లు కలిసి ఉన్న ఫోటో. అక్కడే మెహదీ హసన్ హార్మనీ వాయిస్తూ ఉన్న స్కెచ్ చూసి నాకు కోతి కొమ్మచ్చి లో చదివిన దాని కధ గుర్తొచ్చింది. అలమారా అరల్లో వరుసగా పేర్చి ఉన్న ఆడియో కేసెట్ల కలెక్షన్ చూస్తేనే అవన్నీ బాపు గారికి ఇష్టమయిన ఘజల్స్ అని అర్ధమయిపోయింది. 

ఇందులో మెహదీ హసన్ గారి సంతకం ఎక్కడుందో చెప్పుకోండి చూద్దాం.(తెలియక పోతే కోతి కొమ్మచ్చి మొదటి భాగం ఒక సారి తిరగెయ్యండి)

ఇంతలో ఆయన మెల్లగా తన ఆస్థాన స్థానం (అదే లెండి  కిటికీ పక్కన బల్ల దగ్గర) లో కూర్చుని మమ్మల్నీ కూర్చోమంటూ సైగ చేసారు. కూర్చుని ఆయన గది మొత్తం అబ్బురంగా (బాపు బొమ్మ పుట్టింది, పుట్టేది, పుట్టబోయేది ఇక్కడే కదా మరి) చూస్తూండగా ఆయన తన బొమ్మల ప్రింట్ లు తీసి "ఇందులో మీకు కావాల్సినవి తీసుకోండి" అన్నారు. ఆ క్షణంలో  భగవంతుడు బ్లాంక్ చెక్ మీద సంతకం చేసి కావలసినన్ని వరాలు డ్రా చేసుకో అన్నట్టు అనిపించింది. అవి ఒక యాభై దాకా ఉన్నాయి. అన్నీ తీసుకుంటే ఏమనుకుంటారో (పరమ కక్కుర్తి వెధవ అనుకోవచ్చేమో అన్నా భయం....పాపం ఆయనకేం తెలుసు బాపు బొమ్మ ఇష్టపడని తెలుగోడు పుట్టలేదు, పుట్టబోడు అని?) ఆ క్షణం లో అన్ని చాయిస్ లు ఉండటం కూడా పే...ద్ద ఇబ్బందే సుమీ అనిపించింది. 

ఇంతలో నాకు బాపు గారి పైప్ విషయం గుర్తొచ్చి "సార్ మీ పైప్ ఒక సారి చూడచ్చా?" అన్నాను. ఆయన జవాబు చెప్పే లోపలే డాక్టర్ దగ్గరనుంచి ఆయనకోసం మందు తీసుకొచ్చిన బాపు గారి అమ్మాయి లోపలి వస్తూ కనిపించారు. వెంటనే బాపు గారు కళ్ళతోనే ఆగమని సైగ చేసి ఆవిడ రాగానే "మా అమ్మాయి" అంటూ మాకు పరిచయం చేసారు. ఆవిడ మమ్మల్ని పలకరించి డాక్టరు చెప్పిన సూచనలని (పధ్యం వగైరా) బాపు గారికి చెప్పి వెళ్ళిపోగానే "ఏమయింది సర్" అన్నా? " కాలు కాస్త బాలేదు" ఇదీ ఆయన సమాధానం. (వార్నీ ఇంత మిత భాషా? ). మళ్ళీ పైప్ విషయం గుర్తొచ్చి "అదీ మీ పైప్ గురించి ఏదో చెప్పబోయారు ..." అన్నా. "మానేయాల్సొచ్చింది. అది ఇప్పుడు ఎక్కడుందో ఏంటో, గుర్తు చెయ్యకండి...మళ్ళీ ఎక్కడో మనసు లాగుతుంది' అంటూ నవ్వారు. 

పైప్ - బాపు (పైపెక్కిన మెహది హసన్ పై అభిమానం)

ఇంతలో మా ఆవిడ ఆయన ఇచ్చిన బొమ్మలలోంచి "కోటప్ప కొండ ఆలయమండలి మూల విరాట్" అని ఉన్న బొమ్మ ఆయనకు చూపించి "ఇది నేను తీసుకుంటా" అంది. ఆయన నవ్వుతూ తలూపారు. ఇంతలో నేను బాదామి గుహలలో పద్దెనిమిది చేతుల నటరాజు శిల్పం గురించి ఆయనకీ చెప్పి ఆ ఫోటో నా లాప్ టాప్ లో ఆయనకు చూపించా. "ఆ బొమ్మ మీరేస్తే చూడాలని ఉంది" అని నా కోరికను కూడా చెప్పా. "ఇది నాకొక కాపీ పంపించండి. వేసిస్తా" అన్నారు. అంటూ "అలాంటిదే ఆ మధ్య ఒక కృష్ణుడి బొమ్మ వేసాను...అన్ని చేతులు కాదు కానీ ఎనిమిది చేతులతో ఉంటుంది. ఉండండి చూస్తా" అంటూ వెతికి ఒక బొమ్మ తీసి చూపించి "ఇది మీ దగ్గరుంచండి" అన్నారు. ఇంతలో మా ఆవిడ మొహమాటం తో ఒకే బొమ్మ తీసుకుని మిగిలినవి నా చేతిలో పెట్టింది. "మీరూ కావలసినవి తీసుకోండి" అన్నారాయన. నేను ఆ బొమ్మల్లోంచి ఒక సరస్వతి దేవి బొమ్మ తీసుకుని "ఈ గెటప్ లో ఎమ్మెస్ సుబ్బలక్ష్మి గారి  బొమ్మ గీసిస్తారా? అంటే ఇది తీసుకుంటున్నాను, సరస్వతి దేవి రూపం లో సుబ్బలక్ష్మి గారు కూర్చున్నట్టు బొమ్మ" అని ఆయన్నడిగా. 'ఆ మధ్య భానుమతి గారిది ఇలా వేసినట్టు గుర్తు. సుబ్బలక్ష్మి గారు అలా చూస్తున్న ఫోటో ఏదయినా దొరికితే పంపండి, నేనూ వెతుకుతా, ఐడియా బావుంది' అన్నారు. 

నాకిచ్చిన సరస్వతీ దేవి బొమ్మమీద సంతకం చేస్తూ బాపు గారు

ఇంతలో మా ఆవిడ తను తీసుకున్న "కోటప్ప కొండ ఆలయమండలి మూల విరాట్" బొమ్మ ఆయన ముందు పెట్టి "మీరు ఆటో గ్రాఫ్ చేసి ఇవ్వండి" అని అడిగింది. ఆయన నవ్వుతూ ఆ బొమ్మ తీసుకుని దాని మీద "చి. సౌ. స్వాతి శంకర్ కు శుభాకాంక్షలతో బాపు" అని తారీఖు వేసి ఇచ్చారు. ఆయన రాస్తున్నప్పుడు నాకు కంప్యూటర్ లో బాపు ఫాంట్ గుర్తొచ్చింది. ఇంతలో మా ఆవిడ నా చేతిలో ఉన్న రెండు బొమ్మలూ తీసుకుని ఆయన ముందు పెట్టింది. ఆయన వాటి మీద కూడా "చి. సౌ. స్వాతి శంకర్ కు శుభాకాంక్షలతో బాపు" అనే రాశారు. చెప్పద్దూ!  నాకు మా ఆవిడ మీద భలే కోపం, ఉక్రోషం వచ్చింది. తీసుకున్న మూడు బొమ్మల మీదా తన పేరే వచ్చేసిందే అని. అంతలోనే అందులో ఉన్న "శంకర్" ను చూసి పోన్లే నన్నూ కలిపారు అనుకుని కాస్త కంట్రోల్ చేసుకున్నా.

 ఇవే "బాపు" ప్రసాదం :) - బాపుగారి వద్ద నుండి తీసుకున్న బొమ్మలు 

దీనిమీదే  తరవాత నేను రమణ గారి ఆటో గ్రాఫ్  కూడా తీసుకున్నా  

ఇంతలో బాపు గారు లేచి "పదండి పైకి వెళ్దాం" అంతతో రమణ గారి పోర్షన్ వైపు దారి తీసారు. మేమిద్దరం ఆయన్ని అనుసరించాం.

(మిగిలినది మూడో భాగం లో ) 

బాపు గారి శ్రీరామ రాజ్యానికి నేను రాసుకున్న టైటిల్ సాంగ్ .....

నిన్న ఏదో మాటల్లో బాపు గారు తీస్తున్న శ్రీరామ రాజ్యం సినిమా గురించి నేను నా శ్రీమతి మాట్లాడుకుంటూ ఉండగా సడన్ గా ఆ సినిమాకి టైటిల్ సాంగ్ ఎలా ఉంటుందా అనిపించింది. అంటే రామరాజ్యం గురించి ఏం చెప్తే బావుంటుంది అన్న ఆలోచనతో రాయడం మొదలు పెట్టా. మొత్తం పాట రాయడానికి జస్ట్ ఇరవై నిమిషాలు పట్టింది (అంటే అది నా గొప్ప కాదు లెండి రాములోరిది). చదివి మీ అభిప్రాయం చెప్తే ఆ ధైర్యం తో రమణ గారికి కూడా వినిపించే సాహసం చేస్తా. 

ధర్మం నాలుగు పాదాల నడచిన రాజ్యమిది

దైవం మానుష రూపేణా ఏలిన రాజ్యమిది 

కరకు బోయ కడు రమ్యముగా కీర్తించిన రాజ్యమిది 

భవిష్యత్ బ్రహ్మే బంటుగా ఒదిగిన సిత్రపు రాజ్యమిది 

రామనామమే రాజముద్రగా సాగిన రాజ్యమిది 

ప్రజల క్షేమమే ధర్మసూత్రమై నడచిన రాజ్యమిది  

బడుగు మడేలు మాటకు సైతం విలువిచ్చిన రాజ్యమిది 

ఆలి కన్నా పాలితులే ప్రియమని సెలవిచ్చిన రాజ్యమిది 

పాలనలో ఇల సాటిలేదని కొలచిన రాజ్యమిది 

పాలకులే ప్రజ సేవకులని నేర్పించిన రాజ్యమిది  

ఇదండీ రామరాజ్యం అంటే నాకు తోచినది. ఎలా రాసానో మీరే చెప్పాలిక. 

బాపు - రమణ పక్కన్నేనూ మా ఆవిడ.....అన్నట్టిది నా వందో పోస్ట్. సెంచరీ కొట్టేసా......

హమ్మయ్య ఎలాగైతేనేం ఇప్పటికి నా వందో పోస్ట్ రాయడం కుదిరింది. 

గత ఫిబ్రవరిలో నా జీవితం లో తొలిసారిగా నా అభిమాన రచయిత రమణ గారిని, నాకు నచ్చే దర్శకుడు బాపు గారిని కలుసుకున్నప్పటి విశేషాలు రాద్దామని ఎప్పటికప్పుడు ప్రారంభించడం...రాసింది సంతృప్తికరంగా లేక  మరోసారికి వాయిదా వేయడం...ఇలా మొదటి ప్రేమలేఖ రాసేటప్పుడు మనస్థితి ఎలా ఉంటుందో, అలా అనిపించేది. సరే ఈరోజు బాపు గారి బర్త్ డే కదా, ఇప్పటికీ రాయలేకపోతే కాలెండర్ మారిపోతుంది అనిపించి ధైర్యం చేసి పోస్ట్ చేసేస్తున్నా.

ఈ ఏడాది ఫిబ్రవరి  ఇరవై రెండో తేది. 

ఉదయం ఎనిమిది గంటలు

చెన్నై లోని ఓ హోటల్ రూం లో ఉన్న నేను మా ఆవిడ తీవ్ర తర్జన భర్జనలు పడుతున్నాం. చెన్నై వచ్చి రమణ గారిని కలవకుండా వెళ్ళడం అంటే తిరుపతి వచ్చి వెంకటేశ్వర స్వామిని చూడకుండా వెళ్ళడం లాంటిదే అని నేను, అంత పెద్దాయన మనల్ని కలుస్తారా? మాట్లాడుతారా అని మా ఆవిడ. సరే ఫోన్ చేసి చూద్దాం అని కోతికొమ్మచ్చి పుస్తకం లో ఉన్న రమణ గారి ఇంటికి కాల్ చేసాం. ఫోన్ లిఫ్ట్ చేసింది అర్ధ రమణ గారు (అంటే రమణ గారి శ్రీమతిగారు) . నేను కూడబలుక్కుని "ర మ ణ గారున్నారాండి? అనగానే ఆవిడ "ఇస్తున్నా" అని ఫోన్ ఆయనకిచ్చారు. ఇహ చూస్కోండి నాకు నోట్లోంచి మాట రాలేనంత ఉద్వేగం. నేను సాక్షాత్తు రమణ గారితో మాట్లాడుతున్నా అనే ఆనందం. ఇంతలో "హలో" అంటూ రమణ గారి గొంతు ఫోన్లో పలకరించింది. గుండె ఆనందం తో పేలిపోతుందేమో అనిపించింది. అప్పుడే మాటలు నేర్చుకుంటున్న వాడిలా తడబడుతూ "సర్ నేను...మేము...చెన్నై...వచ్చాము...మిమ్మల్ని కలుద్దామని...." అంటూంటే ఆయన "వచ్చేయండి"  అన్నారు. ఇంటికి ఎలా రావాలో దారి చెప్పారు. 

పెద్దవాళ్ళ దగ్గరకి ఉత్తి చేతులతో వెళ్ళకూడదు. ఏదైనా పళ్ళో, దండలో తీసుకెళ్ళాలి, ఏం తీసుకెళ్దాం? అంది మా ఆవిడ. నేను తాపీగా "ఒక కిలో జీడిపప్పు" అన్నా. నాకేసి వింతగా చూసింది. అవును మరి నేను రమణ గారి అభిమానిని...ఆయన వయసెంతని? బుడుగు కన్నా కాస్త పెద్దవాడేమో అంతే. సరే జీడిపప్పు ప్యాకెట్ పట్టుకుని ఆయన చెప్పిన ఇంటిముందు ఆటో దిగాం. గేటు దగ్గర వాచ్ మెన్ ని "రమణ గారు" అంటూండగానే అతను "పైన, రెండో ఫ్లోరు" అన్నాడు. మెట్లెక్కి పైకి వెళ్ళగానే ఎదురుగా పెద్ద హాలు, ఆ వెనుక ఒక బాల్కనిలో ఎవరితోనో ఫోన్లో మాట్లాడుతూ తెల్ల బనీను, లుంగీ లో  రమణ గారు.ఆయన్ని చూడగానే ఒక్కసారి అన్నమయ్య సినిమాలొ నాగార్జున చెప్పిన పట్టరాని అలసిపోయెంత ఆనందం అంటే  ఎలా ఉంటుందో నాకు అనుభవం లోకి వచ్చింది. మేము నమస్కారం చెయ్యగానే ఆయన కూర్చోండి వస్తున్నా అన్నట్టు సైగ చేసారు. 

                                                                 రమణ గారు వారి శ్రీమతి 

                                                                          వాళ్ళిద్దరితో మేమిద్దరం 

ఫోన్ ముగించుకుని వచ్చిన రమణ గారు "ఆ చెప్పండి" అన్నారు. నాకు చూస్తే ఏం మాట్లాడాలో అర్ధం కావటం లేదు. అర్ధం కావటం ఏంటి నా బొంద..అసలు మాటే పెగలటం లేదు. గుండె గొంతుకలోన కొట్టాడుతున్డాది అని నండూరి వారు అన్నమాటకు అర్ధం అప్పుడు అనుభవం లోకి వచ్చింది. ఇంతలో పాపం మా ఆవిడే కలుగజేసుకుని "ఈయన మీకు పెద్ద ఫ్యానండి" అంది. ఆయన నవ్వుతూ తల ఊపారు. ఏం చెయ్యాలో తోచని నేను చటుక్కున తెచ్చిన జీడిపప్పు ప్యాకెట్ ఆయన చేతికిచ్చి "సర్ మీ కోసం..." అన్నా. రమణ గారు నవ్వుతూ "భలే. జీడిపప్పు తెచ్చారు. అన్నట్టు బాపుగారు  దీనిమీద ఒక కార్టూను కూడా వేసినట్టు గుర్తు. ఈ సన్మానాలు వాటిలో దండలూ అవీ వేసి వేస్ట్ చేసే బదులు ఎంచక్కా ఓ కిలో జీడిపప్పు ఇవ్వరాదూ, పంటికిందకయినా పనికొస్తుంది.. అంటూ ఏదో ఉండాలి." అన్నారు. 

ఆయన ఆమాట అంటూండగానే నేను "సర్ బాపూ గారూ?" అన్నా. ఆయన "కిందే. ఉండండి పిలుస్తా' అని ఇంటర్ కాం నొక్కి "ఒకసారి పైకి రా" అని పిలిచారు. అరనిముషంలో గుమ్మం ముందు లుంగీ, జుబ్బా వేసుకుని కదిలే కుంచెలా బాపు గారు ప్రత్యక్షం. "బాపురే...ఇద్దర్నీ ఒకేసారి చూడటం...ఇది చాలు నా జన్మకి " అనిపించింది. చిరునవ్వుతో లోపలి వచ్చిన బాపు గారికి నన్ను రమణ గారు పరిచయం చేసారు.ఆయన నవ్వుతూ అంతలో అక్కడున్న జీడిపప్పు ప్యాకెట్ కేసి, రమణ గారి కేసి చూసి ఒక చిలిపి నవ్వు నవ్వారు (అంతా నీకేనా అన్నట్టు). రమణ గారు "ఇప్పుడే సన్మానాలలో జీడిపప్పు ఇవ్వచ్చంటూ నువ్వేసిన ఆ కార్టూను గురించి చెప్తున్నా" అంటూ "వీళ్ళకి నీ స్టూడియో చూపించు" అన్నారు. ఉత్సాహంగా బాపు గారు "రండి" అంటూ మమ్మల్ని ఆయన స్టూడియో కి తీసుకెళ్ళారు.

(మిగిలినది రెండో భాగం లో) 

రెండేళ్ళు పూర్తి చేసుకున్న బాపు గారికి (ఈ మాట రమణ గారిదే) జన్మదిన శుభాకాంక్షలు.

ఇదే రోజు మా పిన్ని కూతురు వినీత బర్త్ డే కూడా. తనకీ బ్లాగ్ముఖతా హ్యాపీ బర్త్ డే.